Iwwer unsvom Dialekt – zu Hochdeutsch wechseln

 

De Posaunenchor an de Peterskerch

In unserm Posaunenchor musiziere Leit zwische 12 un 80 Johr, aus de unterschiedlichschde Berufe un Lebensbereiche. Was uns verbindet? Die Freud an de Musik, die Gemeinschaft – un dass mer aach gern mol miteinanner lache.

Bei uns erklinge Trompete, Flügelhörner, Posaune un Tube. Ab un zu sin aach schon Euphonien un Alphörner gesichtet worre – bei uns kann’s also durchaus mol größer werre!

Die musikalische Leitung hat de Felix Schütze. Er sorgt defier, dass mer net nur miteinanner lache, sondern aach miteinanner spiele.

Posaunenchor 2022

Unsere Musik

Unser Schwerpunkt is die Kerchemusik. Unser Repertoire reicht vun traditionelle Choralbearbeitunge un klassische Werke bis zu moderne Kompositione. Aach Swing, Jazz, Pop un Filmmusik sin mit debää – es gibt also einiges uff die Ohre

Wo mer zu höre sin

Mer gestalte Gottesdienschde un Konzerte in de Peterskerch un in de annere evangelische Kerche in Woinem un begleite Gemoindefeschde.

Aach bei viele Veranstaltungen in un um Woinem sin mer zu höre: beim Summerdagszug als „Woinemer Blechveterane“, am Ostermorge uff de Windeck, bei de Fronleichnamsprozession, uff em Weihnachtsmarkt un beim Turmblase an Heiligowend.

Mer musiziere aach uff em Friedhof sowie in Kranke- un Pflegeeinrichtunge. Zu Jubiläe un Geburtstage spiele mer gern e persönliches Ständche. Fer Seniorinne un Seniore sinn dabei aach alde un neue Volkslieder mit debää – zum Zuhöre, Erinnern un vielleicht aach zum Mitsinge.

Unsere Gschicht un Verbunnehait

Unser Posaunenchor is 1920 am Pilgerhaus gegrünnt worre un hat sei Heimat an de Peterskerch gefunne. Zunächscht war er de einzige evangelische Posaunenchor in Woinem. Späder sin aus seine Reihe noch weitere Chöre an de Stadt- un an de Markuskerch entstande.

Mit de Zusammenlegung vun de bisherige Teilgemoinde hat sich aach unser Umfeld verändert. Heit mache mer Musik fer die ganze evangelische Gemoind. De Peterskerch bleibe mer als unserer historische Heimat aber verbunne. Des steckt aach in unserm Name: „Evangelischer Posaunenchor an der Peterskirche Weinheim“.

Mehr iwwer die Anfäng un wie’s dann weitergange is, erfahrt Ihr in de Gschicht vum Posaunenchor an de Peterskirch in Woinem.

Bei uns mitspiele

Luscht, mitzuspiele? Dann nur kaa Scheu – mer freue uns iwwer Verstärkung!

Unner „Mitspielen“ un „Jungbläserschule“ gibt’s alle Infos zum Einstieg un zu unsere Ausbildungsmöglichkeite.

  • Links
  • Kontakt